Ақтөбеде балалар жаттығатын бассейн қызметкері химиялық реагентке тұншығып қалды
АҚТӨБЕ. KAZINFORM - Ақтөбеде «Шағала» бассейні бүгін жұмысты уақытынан бұрын аяқтады. Мұнда қызметкер химиялық реагентке тұншығып, жедел жәрдем шақырған.
Оқиға бүгін сағат 17:30-де «Шағала» балалар-жасөспірімдер су спорты мектебінде болды. 50 жастағы қызметкер химиялық реагенттерді қолдану кезінде өзін жайсыз сезінген.
- Алдын ала жеткен мәліметке сүйенсек, бассейн қызметкері pH реттегішті пайдалану және суды хлорлау кезінде қателік жіберген. Салдарынан ол тұншығып, жедел жәрдем бригадасы ауруханаға жеткізді. Бассейн қызметкерінің жағдайы тұрақты. Ол алғашқы медициналық көмек алған соң амбулаторлы ем қабылдауға жіберілді, - деп хабарлады Ақтөбе облыстық денсаулық сақтау басқармасының баспасөз қызметі.
Қазіргі кезде неліктен оқыс жағдай болғанын арнайы мамандар тексеріп жатыр.
Еске салсақ, бұл бассейн 1 жылдан астам уақыт бойы жөнделді. Ата-аналар жөндеу жұмысының ұзаққа созылғанын айтып, шу шығарды.
