Ақтөбеде бір айда 16 көлік өртеніп кетті

АҚТӨБЕ. KAZINFORM – Ақтөбеде жеңіл көліктер жиі өртенеді. Бір айда 16 көлік жанып кетті. 

Ақтөбе облыстық ТЖД бастығының орынбасары Айбат Жаңабергеновтің айтуынша, өрт көбіне сұйытылған газбен жүретін көліктерде тіркеледі. 

– Қаңтар айынан бері 16 көлік өртенді. Бұл былтырғыға қарағанда көп. Көбіне электр жабдықтарының қысқа тұйықталуы, өрт сөндіру құралдарының болмауы, аккумулятордың уақытылы тексерілмеуінен болып тұр. Қыста көлік құралдарын жиі тексеріп тұру керек, - деді Ақтөбе облыстық ТЖД бастығының орынбасары Айбат Жаңабергенов. 

Айта кетейік, Ақтөбе облысында былтыр көліктерде 152 өрт тіркелді. Материалдық шығыны – 37 млн теңге. Өртенген көліктің көбі – жеңіл көлік. 

– Қазір екінің бірі сұйытылған газбен жүреді. Кейбірінде орнатылған газ құрылғысы тіркелмеген болып шығады. Мұндай деректерді полицияға жібереміз. Егер көлік газбен жүрсе, жарылып кетуі мүмкін. Өрт сөндіру кезінде мұның бәрі ескеріледі, - деді облыстық ТЖД басқарма бастығы Евгений Овчарксий. 

Еске салсақ, қаңтар айында Ақтөбе қаласында екі техникалық қызмет көрсету орталығы өртенді. Онда 4 көлік жанып кетті.