Ақтөбеде дәретханадан табылған «бомба» қонақүй қызметкерлерін әбігерге салды
АҚТӨБЕ. ҚазАқпарат – Ақтөбедегі «Ibis» қонақүйі қауіпсіздік қызметінің бастығы полициядан көмек сұрады. Ол дәретханадан «жарылғыш заттың» табылғанын хабарлады, деп хабарлайды ҚазАқпарат тілшісі.
Ақтөбе қалалық полиция бөлімінің жедел басқару орталығына Сейітов көшесінде орналасқан «Ibis» қонақүйі қауіпсіздік қызметінің бастығынан хабарлама түсті. Ол дәретханадағы қол жуатын орыннан жарылғыш заттың табылғанын айтты.
«Оқиға орнына барлық жедел қызмет жіберілді. Полиция қызметкерлері «Ibis» қонақүйінен 97 адамды эвакуациялады. Олардың 10-ы қонақүй қызметкері, жетеуі банк қызметкері, өзгесі қонақүй бөлмесін жалға алғандар. Арнайы бөлімше саперлері қонақүйдің әкімшілік ғимаратына тексеру жүргізді. Тексеру барысында бірінші қабатта орналасқан дәретхана бөлмесіндегі қол жууға арналған орыннан жарылғыш құрылғысына ұқсас металл зат табылды. Металл корпуста «муляж» гравировкасы бар. Қазір оны тастап кеткен адамды анықтауға бағытталған арнайы және жедел-іздестіру іс-шараларыжүргізіліп жатыр. Аталған факті бойынша ҚР Қылмыстық кодексте «Атыс қаруын, оқ-дәрілерді, жарылғыш заттарды немесе жарылғыш құрылғыларды заңсыз сатып алу, беру, өткізу, сақтау, тасымалдау немесе алып жүру» бабы бойынша сотқа дейінгі тергеу басталды», - деп хабарлады облыстық ПД баспасөз қызметінің жетекшісі Ерболат Сарқұлов.
