Ақтөбеде қар жауып, көлік дөңгелегін ауыстыруға кезек көбейді
АҚТӨБЕ. KAZINFORM - Ақтөбеде қар жауып тұр. 2025 жылға жолдарды күтіп ұстауға 2,7 млрд теңге бөлінеді. Ал көлік жөндейтін техникалық қызмет көрсету орындарында кезек көп.
Ақтөбе қаласында қазір қар жауып тұр. Мұнда қозғалыста қандай да бір кедергі байқалмады. Дегенмен көлікке қызмет көрсететін орындарда кезек таңғы сағат 7:00-де басталды. 9:00-де ғана жұмысын бастаған жұмысшылар әр 20-30 минут сайын бір көліктің 4 доңғалағын ауыстырады.
- Қар жауған күні дәл осындай кезекті көреміз. Бұл біз үшін үйреншікті жағдай әрі табысымыз артады. Таңда ашылғаннан бері 5 көлікке қызмет көрсеттік. Олар өзара кезекке тұрады, біз сол кезекпен ауыстырып береміз. Шиномонтажда 4 адам жұмыс істеп жатыр. Әркімнің өз қызметі бар. Бірі доңғалақты шешіп алады, екіншісі жарамдылығын тексеріп, алмастырады. Көктайғақ жоқ қазір, бірақ адамдар сақтық үшін ауыстырады. Қар жаумағанда, қазан айының соңында-ақ кезек қойып жатты», - деді техникалық қызмет көрсету орнының қызметкері Антон Степанов. Бұл жердегі қызмет құны 6 мың теңгеден басталып, 10 мың теңгеге жетеді.
Ақтөбе облысы әкімінің баспасөз қызметінің хабарлауынша, жергілікті жолдарды күтіп ұстау үшін 2025 жылға 2,7 млрд. теңге қарастырылған. Бұл сома облыстық мәслихаттың таяудағы сессиясында бекітіледі.
- Облыстағы жолдардың жалпы ұзындығы – 4 440 шақырым. Оның ішінде 1 265 шақырымы облыстық маңызы бар, 3 175 шақырымы аудандық маңызы бар жол. Бұл жолдарды қыста күтіп ұстауға 43 мердігер ұйым жауапты. 401 техника, 5 мың тонна инертті материал, 965 тонна дизель отыны әзірленді. Ақтөбе облыстық жолаушылар көлігі және автомобиль жолдары басқармасының басшысы Айбек Қайырдың айтуынша, жылыту пункттерін дайындау және оларды қажетті азық-түлік қорымен қамтамасыз ету, сондай-ақ жол бойындағы су өткізу құбырларын тазалау жұмыстары аяқталып қалды,- деп хабарлады Ақтөбе облысы әкімінің баспасөз қызметі.
Еске салсақ, қыста Ақтөбе облысындағы республикалық маңызы бар жолдарды «ҚАЖсервис» компаниясы мен жөндеу жұмыстарын жүргізіп жатқан мердігер күтіп ұстайды. Жеткіліксіз техникаларды жалға алуды жоспарлап қойған.
