Ақтөбеде олимпиадаға бара жатып, жол апатынан көз жұмған оқушылардың ісі сотқа түсті

АҚТӨБЕ. KAZINFORM – Ақтөбеде жол-көлік апаты кезінде көз жұмған оқушылар мен мұғалімге қатысты іс облыс орталығында қаралатын болды.

Ақтөбе облыстық соты баспасөз қызметінің хабарлауынша, Ырғыз ауданындағы жол-көлік апатына қатысты іс облыстық қылмыстық істер жөніндегі мамандандырылған ауданаралық сотында қаралады. Алдын ала тыңдалым 23 ақпан күні өтеді. 

Еске салсақ, былтыр 19 желтоқсан күні Самара — Шымкент тасжолындағы Қызылжар ауылы маңында үш көлік соқтығысып, салдарынан 2 оқушы мен мұғалім оқиға орнында көз жұмды. 

Оқушыларды аудан орталығына сол мектептің мұғалімі әрі оқушының ағасы жеке көлігімен тасымалдаған. Қазіргі кезде рульде болған мектеп қызметкеріне қатысты Қылмыстық кодекстің 345-бабы 4-бөлігі, яғни, «Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы» бабымен іс қозғалып, тергеу жүрді.