Ақтөбедегі тікұшақ апаты: Зардап шеккен екі адам есін біледі

АҚТӨБЕ. KAZINFORM — Ақтөбеде апатты қонған тікұшақ ішіндегі екі адам аурухананың жансақтау бөлімінде ем қабылдайды. Екеуі де есін біледі.

Ақтөбе облыстық денсаулық сақтау басқармасы баспасөз қызметінің хабарлауынша, екеуі де қала орталығындағы көпсалалы ауруханаға жеткізілді.

— Зардап шеккен екі адамның жағдайы тұрақты ауыр. Екеуі де есін біледі, сұрақтарға жауап беріп жатыр. Ұшақтың құлағаны туралы ақпарат 103 қызметіне сағат 11:36–да түсті. Оқиға орнына Мәртөк аудандық ауруханасынан жедел бригада жетті. Бір адам жедел жәрдем барғанша көз жұмған. Ал екеуін аэродромнан күтіп алып, күйік шалқан науқастарды облыстық көпсалалы ауруханаға жеткізді. Қазір реанимация және интенсивті терапия бөлімінде жатыр. Түрлі диагностикадан өтеді, — деп хабарлады Ақтөбе облыстық денсаулық сақтау басқармасы баспасөз қызметі.

Еске салсақ, бүгін Ақтөбеде тікұшақ құлағаны белгілі болды.

Кейіннен тікұшақ апаты кезінде 1 адам көз жұмғаны анықталды.