Алматыдағы көлік кептелісін реттеу: Қаладан шыға берісте жаңа жол өткелі салынады
АЛМАТЫ. KAZINFORM –Алматыдан облысқа шығатын жолда күн сайын шақырымға созылатын көлік кептелісі байқалады. Оларды реттеу үшін әкімдік қандай шараларды қолға алып жатыр. Kazinform агенттігінің тілшісі анықтап көрді.
Адамдар кешке Алматыдан облысқа шығу үшін, таңертең қалаға кіру үшін сағаттап көлік кептелесінде тұрады. Бұның өзекті мәселеге айналғалы біраз жыл болды.
Көлік кептелісі тек «Алтын-Орда» базары аумағында және Талғар бағытында ғана емес, сонымен қатар мегаполиске апаратын шығыс, батыс және солтүстік бағыттағы негізгі жолдарда байқалады.
Алматы облысының жолаушылар көлігі және автомобиль жолдары басқармасы көлік кептелісі мәселесін шешуге бағытталған шаралар туралы мағлұмат берді.
Алатау қаласына қарай жол өткелі салынады
Ведомствоның хабарлауынша, жобалық-сметалық құжаттама әзірленіп, мемлекеттік сараптамадан өтті. Қазір Алматы облысы Іле ауданы (ДАМУ ауданы) 6,8 шақырымында «Алматы-Жетіген-Қапшағай» су қоймасы жолының бойында жол өткелінің құрылысына жер телімдерін алып қою жұмыстары жүргізіліп жатыр. Егер бюджеттен қаржы бөлінсе, құрылыс жұмыстары 2025 жылға жоспарланған.
Жол өткелі - көлік қозғалысының негізгі жолы ретінде қарастырылады. Жоба аясында қолданыстағы жолдың ені 11 метрден 12 метрге дейін өзгереді және екі жолақтан тұрады. Әр бағытта бір жолақтың ені 3,75 метр.
Жол өткелінің жобасы бойынша ені 3,75 метрлік екі бағыт болады. Әр бағытта ені 1 метрлік қауіпсіздік жолағы және жол бағыттарын бөліп тұратын жолақта қоршау орнатылады. Жол бағыттарын бөліп тұратын жолақтың ені металл кедергі қоршауларды орнату үшін 3 метр болады. Ал жолаушыларға арналған жолдың ені екі жағынан да 1,5 метрге жетеді.
Жолды кеңейту
Сондай-ақ, «Виносовхоз – Чапаев» жол учаскесін (0,5-0,8 км, Ащыбұлақ айналма жолы) қайта жаңартудың жобалық-сметалық құжаттамасы мемлекеттік сараптамаға жолданды. Жобада кеңейтілген жол бөлігі,қосымша шығатын жолдар және бағдаршам қиылысын орнату қарастырылған. Қайта құру жұмыстарын бюджет қаражаты бөлінген жағдайда 2025 жылы бастау жоспарланып отыр.
Көшелерді ұзарту
Алматы агломерациясы аясында ҚР Президентінің тапсырмасына сәйкес Алматы облысының аумағы арқылы алты радиалды көшенің құрылысы жүргізіліп жатыр. Оның ішінде Абай, Рысқұлов, Ақын Сара, Саин, Тілендиев және Солтүстік айналма көшелері бар.
– Бұл жобаның негізгі мақсаты – көлік инфрақұрылымын жақсарту, жол желілерінің қолжетімділігі мен сапасын арттыру, азаматтардың жол жүру уақытын қысқарту. Жоба көлік ағындарын оңтайландыру және экологиялық таза технологияларды енгізу арқылы жылдамырақ және ыңғайлы бағыттарды құруға, ауаның ластануын азайтуға бағытталған. Сондай-ақ, жол қозғалысы қауіпсіздігін арттыруға ерекше көңіл бөлініп отыр. Бұл жол-көлік апаттарын азайтып, жүргізушілер мен жаяу жүргіншілер үшін жағдай туғызады, – деп атап өтті облыстық жолаушылар көлігі және автомобиль жолдары басқармасынан.
Қаланың басқа бөліктері
Ведомство автомобиль жолдары комитеті ҚР Ұлттық экономика министрлігіне Талғар, Есік және Қаскелең қалаларын Алматы қаласымен (Алматы-Талғар – Есік - Байдібек би - 68 км және Алматы-Қаскелен-Ұшқоныр-Ұзынағаш — 84 км) байланыстыратын бағыттарда жол инфрақұрылымын кеңейту және жақсарту жобасы бойынша экономикалық қорытынды алу үшін инвестициялық ұсыныс жасағанын мәлімдеді.
Ұлттық экономика министрлігінен келісім алғаннан кейін жобалық-сметалық құжаттаманы әзірлеуге қаражат бөлу мәселесі республикалық бюджет комиссиясының қарауына шығарылады.
Алматыға алыс-жақын маңдағы ауылдардан көлігімен не қоғамдық көлікпен қатынап жұмыс істейтін адамдар аз емес. Мегаполиске әркім әртүрлі жолмен келсе де, бәрінің шағымы бір, ол — сағаттап уақыт алатын кептеліс.
Осыған дейін Kazinform тілшісі Ұзынағашқа шығатын жолда болатын кептеліс мәселесімен танысып қайтқан болатын.
Бұл тұрғындар кептеліске шағымданатын жалғыз тасжол емес. Көлік иелері 2021 жылдың аяғында жаңа жолайрығының пайдалануға берілгеніне қарамастан, Алматының батыс шығысында, әсіресе, «Алтын Орда» базары мен «Апорт» сауда орталығы маңында бірнеше шақырымға созылатын кептеліс күнде байқалатынын айтады.
Еске салайық, 2021 жылы «Алтын орда» базары маңындағы «Алматы-Райымбек» учаскесінде жаңа бас магистральдық эстакада пайдалануға берілген болатын.
Сондай-ақ «Алматы-Талғар» тасжолының кеңейтілетінін жазған едік.
