Астанада G-Park компаниясына жаңа құрылыс бастауға тыйым салынды

Астана әкімдігі G-Park компаниясына 12 нысанды аяқтап, үлескерлерге кілт тапсырғанша жаңа құрылыс бастауға тыйым салды. Бұл туралы Астана қаласының әкімі Жеңіс Қасымбек айтып берді, деп хабарлайды Kazinform.

«Бүгінгі таңда G-Park қалада 12 нысанның құрылысымен айналысуда. Шынында да, биыл компанияда әртүрлі мәселелер болды. Бірақ әрбір тұрғын үй бойынша Астана әкімдігі бұл мәселені ерекше бақылауда ұстап отыр. Бұл жағдайды өте жақсы білеміз. G-Park компаниясы міндетті түрде осы 12 нысанды аяқтап, үлескерлерге кілт тапсырады», - деп түсіндірді әкім Орталық коммуникациялар қызметінде өткен баспасөз мәслихатында.

Оның айтуынша, компания осы 12 нысанды аяқтап, кілт тапсырғанша жаңа нысандарды салуға тыйым салынған.

Еске салсақ, биыл сәуірде жерді рәсімдеудегі заңсыз әрекеті үшін «G-Park» компаниясына тиесілі «Дублин» және «Вашингтон» тұрғын үй кешендері сүрілетінін жазып едік.

Кейін «Вашингтон» тұрғын үйі сүрілмейтін болды, құрылыс компаниясына жіберілген ақауларды жойып, барлық қажетті рұқсат құжаттарын рәсімдеу тапсырылды.