Былтыр Өзбекстанда жасалған аса ауыр қылмыстар саны 24 пайызға өсті

ТАШКЕНТ. KAZINFORM – Былтыр Өзбекстанда 132 298 қылмыс тіркелген, бұл 2023 жылмен салыстырғанда 27,1%-ға көп, деп хабарлайды Kazinform агенттігінің меншікті тілшісі.

Елдің Статистика агенттігінен мәлім еткендей, бір жылда жасалған аса ауыр қылмыстардың саны күрт артты. Атап айтқанда, былтыр мұндай сипаттағы 5 357 қылмыс тіркелді, бұл 2023 жылғы деректермен салыстырғанда 24,1%-ға көп.

Олардың басым бөлігі көпшілігі Ташкент қаласында (1 753) жасалған. Одан кейін Ташкент облысы (563), Самарқан (489) және Ферғана (411) өңірлері тұр.

Еске салайық, таяуда Өзбекстанда заңсыз байлыққа кенелгендерге жаза енгізу ұсынылды.

Бұған дейін хабарлағанымыздай, былтыр Өзбекстанда жол апатынан 2 мыңнан астам адам қаза тапты. Сондай-ақ, Өзбекстанда жол ережесін жиі бұзатындар енді көлік басқару құқығынан айырылады.

Мұнымен бірге, 2024 жылы мас күйінде көлік басқарған 31,3 мың өзбекстандық әкімшілік жауапқа тартылды.