Денис Евсеев Испаниядағы турнирдің іріктеу сайысын сәтті бастады

АСТАНА. KAZINFORM – Қазақстандық теннисші, әлемнің 366-ракеткасы Денис Евсеев Мурсия (Испания) челленджер турнирі іріктеу сайысының финалына шықты.

Іріктеудің 4-ракеткасы болып тіркелген Д.Евсеев бастапқы кездесуін испаниялық Давид Вега-Эрнандеспен өткізді. Қазақстандық спортшы қарсыласын 6:4, 6:3 есебімен тізе бүктірді.

Бір сағат 15 минутқа созылған бәсекеде Евсеев 1 эйспен бірге 10 брейк-пойнттың тең жартысын мүлт жіберген жоқ. Вега-Эрнандес 3 брейкпен көзге түсті.

Денис Евсеев іріктеу сайысының финалында рейтингіде 1 031-орындағы Польша өкілі Флип Печонкамен ойнайды. Оны жеңсе, негізгі жарысқа жолдама алады. 

Тағы бір қазақстандық, әлемнің 259-ракеткасы Михаил Кукушкин бірден негізгі турнирде бақ сынайды. Оның қарсыласы – рейтингіде өзінен 20 саты жоғары тұрған литвалық Эдас Бутвилас. 

Еске сала кетейік, бұдан бұрын Әмір Омархановтың Тунистегі турнирде чемпиондық атақ үшін таласатынын жазған болатынбыз.

Анна Данилина Индиан-Уэллс турнирінің финалында есе жіберді.