Дулат Бекбауов Азия чемпионатының екі дүркін күміс жүлдегері болды
АСТАНА. KAZINFORM – Таиландтың Чиангмай қаласында бокстан өтіп жатқан Азия чемпионатында Дулат Бекбауов күміс медальға ие болды.
Бұған дейін әлем және Азия біріншілігінің күміс жүлдегері атанып үлгерген Д.Бекбауов 67 келіге дейінгі салмақта өзбекстандық Мужибилло Турсуновпен шеберлік байқасты.
Аса қызу өткен жекпе-жек барысында бірінші раундта төрешілер басымдықты М.Турсуновқа берді – 3:2. Екінші кезеңде дәл осындай есеппен Дулат алға шықты.
Үш раундтан соң бейнежазбаны қайталап көрген төрешілер жеңісті өзбекстандық боксшыға беріп жіберді. Осылайша, Қазақстан қоржынына әзірге 1 алтын, 3 күміс түсті.
Еске сала кетейік, бұдан бұрын Санжар Тәшкенбайдың бокстан Азия чемпионатының күміс жүлдегері атанғанын жазған едік. Сондай-ақ Махмұд Сабырхан алғаш рет бокстан Азия чемпионатында топ жарды. Оразбек Асылқұлов бокстан Азия чемпионатында күміс алды.
