Ел өңірлерінде сиыр етінің бағасы қаншалықты өзгерді

АСТАНА. KAZINFORM – Сауда және интеграция вице-министрі Қайрат Төребаев ел өңірлерінде сиыр етінің бағасы өскенін айтты.

Бүгін Сенаттың жалпы отырысынан кейін тілшілер қазір еліміздің оңтүстік өңірлерінде сиыр еті бағасының өсуі мен Өзбекстанға мал экспортының артуына қатысты сұрақ қойды.

Өз кезегінде вице-министр Қазақстан дәстүрлі түрде көрші елге ет экспорттайтынын айтты.

- Жыл сайын Өзбекстанға 20 мың тоннаға жуық сиыр етін экспорттаймыз. Ресми деректерге сәйкес, 2025 жылдың басынан бері сиыр еті бағасының индексі 8,4 пайызға өсті, бір аптада бағаның өсуі 0,6 пайызды құрады. Жыл басынан бері барлық 20 өңірде бағаның өсуін байқадық. Облыстарда әртүрлі деңгейде болды, кейбірінде біршама аз сомада өсті. Ал Түркістан облысында 3 пайыз шамасында өсім болды. Жалпы, еліміз бойынша орташа баға 2800 теңге деңгейінде, - деді Қайрат Төребаев.

Бұдан бұрын хабарланғандай, биыл 26 ақпанда ҚР Сауда және интеграция министрі Арман Шаққалиев сиыр етінің бағасы не себепті күрт артқанын түсіндірді.

Оның айтуынша, ішкі нарықты қамтамасыз ету аясында көрші Өзбекстанға ірі қара мал еті экспортталмай жатыр.

Еске салсақ, Ауыл шаруашылығы министрлігі былтырғы ет экспортына қатысты түсінік берді.

Сиыр етінің негізгі экспорты Өзбекстанға бағытталған.