Электронды сауда саласында шағымдар саны күрт өсіп келеді

АСТАНА. KAZINFORM — Елімізде электронды сауда саласында шағымдар саны күрт өсіп келеді. Сондықтан жаңа заңда бұл қатынасты реттейтін жаңа нормалар енгізіледі. Бұл туралы ҚР СИМ Тұтынушылардың құқықтарын қорғау комитетінің төрағасы Асқар Тынысбеков айтты.

— Экономика салалары бойынша айтатын болсақ, ең көп шағым бөлшек сауда (37,5%) және электронды сауда (23,2%) сегменті бойынша келіп түскен. Айта кетер жайт, электронды саудада шағым саны 2022 жылдан 2024 жылға дейін 5,5 есе өскен. Алдағы уақытта да осы саланың дамуына байланысты шағымдар саны да өседі деп болжап отырмыз. Сол себепті жаңа заң жобасында «Электронды сауда» деген жеке бөлім болады, — деді ол ОКҚ алаңында.

Спикердің айтуынша, шағым саны бойынша келесі орындарда мына салалар тұр: 

— тұрмыстық қызметтер саласы — 8,8%;
— тұрғын үй-коммуналдық шаруашылығында — 7,4%;
— байланыс қызметтері — 3,5% және т. б.

Заң жобасында бұдан бөлек те бірқатар жаңа нормалар бар. 
Бұған дейін елімізде тұтынушылар құқығын қорғау омбудсмені институты құрылатынын жаздық.

Сондай-ақ, тұтынушы енді шағымданудың міндетті 4 сатысынан өтпей, бірден сотқа арыздана алады. 

Маркетплейстерге де жауапкершілік жүктелетін болады.