Футболдан Қазақстан чемпионатында «Тараз» «Шахтерді» тізе бүктірді

Өткен турда қарағандылықтар «Мақтааралды» 5:1 есебімен ұтса, тараздықтар елордада «Астанаға» есе жіберген еді – 1:2.
Бұл жолы қос команда құрамында аздаған өзгерістер болды.
Бірінші таймда есеп ашылмаса, ойынның екінші кезеңі әлдеқайда тартысты өтті. 58-минутта Бауыржан Байтананың әдемі пасынан кейін тараздық Абылайхан Жұмабек есеп ашты – 1:0. Содан кейін 78-минутта Б.Байтананың тағы бір тамаша пасын Әділет Кеңесбек мүлт жібермеді – 2:0.
Матч соңында 97-минутта Айдос Тәттібаев 11 метрлік айып добын дәл орындап, есепті қысқартты. Сосын «Шахтер» сапынан дөрекілігімен көзге түскен Михаил Габышев алаңнан қуылды.
Қорытынды есеп – 2:1, «Тараздың» пайдасында.
Бұл ойыннан кейін 8 ұпай жинаған «Тараз» жетінші орынға көтерілді.
Чемпионаттағы алғашқы жеңілістің дәмін татқан «Шахтер» 10 ұпаймен 4-орында қалды.
Келесі турда 21 сәуір күні «Тараз» сырт алаңда «Ақсумен» ойнаса, «Шахтер» Қарағандыда Оралдың «Ақжайығын» қабылдайды.
Бүгін сондай-ақ «Мақтаарал» «Ақсуды» 2:1 есебімен ұтып, биылғы маусымдағы тырнақалды жеңісіне қол жеткізді.
Біріншілікте жеңілмеген бір команда – «Қайрат» қана қалды.
Еске сала кетейік, бұдан бұрын футболдан Қазақстан чемпионатында «Ақжайықтың» «Астанадан» басым түскенін, «Қайсардың» қайта көш басына шыққанын жазған болатынбыз.
Сондай-ақ «Тобыл» мен «Қайрат» тең ойнады.