Футзалдан Чемпиондар лигасы: «Аят» хорватиялық командадан жеңілді
АСТАНА. ҚазАқпарат - Қазақстандық «Аят» футзалдан UEFA Чемпиондар лигасының негізгі сатысындағы үшінші ойынын өткізді, деп хабарлайды ҚазАқпарат тілшісі.
Бұл жолы қазақстандық команда Хорватияның «Пула» клубымен кездесті.
Кездесуді қазақстандық футзалшылар сәтсіз басталды. Хорватия командасы қатарынан үш гол соғып кетті. Ойынның 19-минутында «Аят» сапынан Азат Валиуллин есеп айырмасын қысқартқан еді. Одан кейін хорватиялық команда тағы бір гол енгізді.
Екінші кезеңді «Аят» ойыншылары қарқынды бастады. Нәтижесінде Леандро 24-минутта гол соқса, 26-минутта «Пула» командасы оған бір голмен жауап қайырды.
Осылайша «Аят» қарсыласынан 2:5 есебімен жеңіліп, жарысты жалғастырудан тыс қалды.
Еске салсақ, бұдан бұрын Хорватияның «Ново Време» клубымен 2:2 есебімен тең түссе, одан кейін Португалияның «Спортинг» клубына 1:7 есебімен жол берді.
Ал Алматының «Қайраты» турнирдің элиталы сатысына жолдама алды.
