Германия Қазақстаннан мұнай экспортын екі есе арттыруды сұрап отыр - энергетика министрі
АЛМАТЫ. KAZINFORM - Германия Қазақстаннан жеткізілетін мұнай көлемін арттыруды сұрап отыр. Бұл туралы 29-шы қазақстандық халықаралық «Мұнай және Газ» көрме мен конференциясы барысында энергетика министрі Алмасадам Сәтқалиев айтты.
«Қазақстан жыл соңына дейін Германияға 1,2 миллион тонна мұнай экспорттайды. Германия тарапынан мұнайдың жалпы көлемін 2,5 миллион тоннаға дейін арттыру туралы өтініш түсті», - деді Алмасадам Сәтқалиев.
Осыған дейін Мемлекет басшысы Орталық Азия мемлекеттері басшылары мен Германия Федералдық канцлерінің кездесуі барысында Қазақстан неміс нарығына мұнай экспортын арттыруға әзір екенін жеткізген болатын.
Айта кетейік, бұған дейін «Байтақ» партиясы төрағасының орынбасары қызметіне кіріскен Олег Пак мұнай өндіруші компаниялармен жасалған келісімшарттардың шартын ашу мәселесін көтерген еді.
