Хостелдегі өрт оқиғасы: сотталушы үйқамаққа ауыстырылды

АЛМАТЫ. KAZINFORM — Алматыда 13 адам өлім құшқан хостелдегі өртке қатысты айыпталып отырған ALA Hostel директоры Әділбек Мұхамедьяровқа қатысты бұлтартпау шарасы жеңілдетілген түріне өзгертілді.

Іс Алмалы аудандық сотында қаралып жатыр. ALA Hostel директоры Әділбек Мұхамедияров пен «Гидсервис» компаниясының иесі Александр Пекельникке ҚР Қылмыстық кодексінің 292-бабы 3-бөлігі (Өрт қауіпсіздігі талаптарын бұзу, абайсызда екі немесе одан да көп адамның өліміне әкелу) бойынша айып тағылған.

Кезекті сот отырысында судья Ернар Қасымбеков Әділбек Мұхамедьяровқа қатысты бұлтартпау шарасын неғұрлым жеңіл – үйқамаққа өзгерту туралы шешім шығарды. 

Оның айтуынша, процесс алты айдан бері жалғасып келеді. ҚР Қылмыстық-процестік кодексінің 342-бабына сәйкес, егер орташа ауыр қылмысқа қатысты айыпталушы алты айдан астам уақыт қамауда отырса, сот бұлтартпау шарасын үйқамаққа немесе басқа жеңіл шараға өзгертуге міндетті.

Осыған дейін прокурор Нұразхан Мырзалы айыптау актісін оқыған болатын.

Еске салайық, 2023 жылдың 30 қарашасында Әди Шәріпов, 86 мекенжайы бойынша «Almaty Hostel» хостелі өртенген болатын.

Төтенше жағдай департаментіне өрт туралы хабарлама 05:33-те түскен. Өрт салдарынан хостелде 13 адам қайтыс болды. 

Мерт болған 13 адамның төртеуі – шетелдіктер (Ресей Федерациясының 2 азаматы және Өзбекстанның 2 азаматы), қалған тоғызы – Қазақстан Республикасының азаматтары.

Кейінірек өртенген хостелдің иелері белгілі болды. 

Хостел ғимараты Halyk Bank-ке тиесілі. Оны жалға алған – «ALA Hostel» ЖШС. Жалдау туралы келісімшарт 2023 жылы 21 қыркүйекте жасалған.