Қырғызстанда зорлық-зомбылық пен адам саудасына қарсы 5200 жедел желісі ашылды

АСТАНА. KAZINFORM — Қырғызстанда зорлық-зомбылық пен адам саудасынан зардап шеккендерге арналған 5200 сенім телефоны іске қосылды, деп хабарлайды Кабар.

Мемлекеттік әлеуметтік тапсырыс аясында Еңбек, әлеуметтік даму және көші-қон министрлігі жаңа әлеуметтік жобаны — тәулік бойы жұмыс істейтін 5200 сенім телефонын іске қосты.

Ведомствоның мәліметінше, бұл желі отбасылық зорлық-зомбылық пен адам саудасынан зардап шеккендерге жедел әрі сапалы көмек көрсетуге арналған.

5200 нөміріне қоңырау шалған әрбір азамат тегін, анонимді және құпия түрде көмек ала алады. Сенім телефонында зорлық-зомбылық, дағдарыстық жағдайлар және психологиялық қолдау көрсету мәселелері бойынша арнайы дайындықтан өткен кәсіби психологтар мен кеңесшілер жұмыс істейді.

Сенім телефоны тәулігіне 24 сағат, аптасына 7 күн жұмыс істейді және Қырғыз Республикасының бүкіл аумағында барлық ұялы байланыс операторы арқылы қолжетімді.

Сенім телефонының негізгі бағыттары:

• зорлық-зомбылық пен қанауға ұшыраған жандарға психологиялық қолдау көрсету;

• зардап шеккендердің құқықтарын қорғау шаралары мен қолжетімді қызметтер туралы ақпарат беру;

• қауіпсіз баспана, медициналық және заң көмегіне қатысты кеңес беру;

• зорлық-зомбылық құрбандарының туыстары мен куәгерлеріне қолдау көрсету.

Бұдан бұрын Бішкекте тұрмыстық зорлық-зомбылық құрбандарын қорғау үшін электронды білезіктер енгізілгенін жазғанбыз.

Сондай-ақ Қырғызстан түнде алкоголь сатуға шектеулер енгізуді жоспарлап отыр.