Қызылордада Ұлттық құрылтай отырысын ұйымдастыру жөніндегі жұмыс тобы құрылады

ҚЫЗЫЛОРДА. KAZINFORM — Қызылорда облысының әкімі Нұрлыбек Нәлібаев бүгінгі мәжілісте Ұлттық құрылтай отырысын ұйымдастыру жөніндегі жұмыс тобы құрылатынын мәлімдеді.

Еске салсақ, Бурабайда өткен IV Ұлттық құрылтайда Президент Қасым-Жомарт Тоқаев «Биыл ел астанасын Қызылордаға көшіру туралы тарихи шешімнің қабылданғанына және халқымызға «қазақ» атауының қайтарылғанына бір ғасыр толды. Мұндай маңызды оқиғалар ел жадында сақталуы тиіс» дей келе, Ұлттық құрылтайдың келесі отырысын Қазақ елінің астанасы болған Қызылорда қаласында өткізуді ұсынды.

Аймақ басшысы бұл бастама барша Сыр жұртшылығына артылған сенім және абыройлы міндет екенін атап өтті. 

— Құрылтайдың кезекті отырысын «Алаштың анасы» атанған қасиетті Сыр өңірінде өткізудің тарихи тұрғыдан маңызы зор. Дайындыққа осы бастан кірісіп, құрылтайды жоғары деңгейде ұйымдастыруымыз керек. Облыстық қоғамдық даму басқармасына Ұлттық құрылтай отырысын ұйымдастыру жөніндегі жұмыс тобын құруды тапсырамын. Жұмыс тобының құрамына облыс әкімінің орынбасарларын, басқарма, департамент басшыларымен қатар зиялы қауым, азаматтық қоғам өкілдерін, тарихшы ғалымдарды қосу қажет. Топ жұмысын үйлестіру облыс әкімінің орынбасары Шахмардан Баймановқа жүктеледі, — деді облыс әкімі.

Бұған дейін Ұлттық құрылтайдың V отырысы Қызылордада өтетінін хабарлағанбыз.