Құбырдағы ақау: Майқайыңдағы резервуарда екі тәулікке жететін су бар

құбыр жөндеу
Фото: Павлодар облысы әкімдігі

ПАВЛОДАР. KAZINFORM — Майқайың кенті мен «Богатырь-Көмір» АҚ-на су жеткізетін магистральды құбырда анықталған ақауды жою жұмыстары әлі жалғасып жатыр. Жөндеу жұмысына 95 адам жұмылдырылған.

Павлодар облысы әкімінің баспасөз қызметінен хабарлағандай, 1020 мм-лік құбырдағы залалды қалпына келтіруге «Екібастұз қалалық су арнасы» МКК, «Шығыс» кеніші, «Инженерлік желілер» ЖШС және «Майқайың-алтын» АҚ мен Павлодар облысы төтенше жағдайлар департаментінен мамандар тартылған.

Барлығы 95 адамнан тұратын 10 бригада және 40 арнайы техника жұмылдырылды. 

— Құбырдың төрт жерінде судың ықтимал қатуын және ауа жиналып қалуын анықтау үшін жер қазылып жатыр. Тағы 11 учаскеде құбырларды ашу жұмыстары жалғасуда. Қосымша 2 бригада Майқайың кентіндегі судың ағуын анықтап, қысымын өлшеп жатыр. Қазір кентке су төмен қысымда берілген, -деп мәлімдеді өңір әкімінің баспасөз қызметінен.

Белгілі болғандай, Майқайыңда көлемі 10 000 текше метр болатын резервуарда 2 тәулікке жететін су қоры бар.

Оны 231 жеке тұрғын үй, 58 көпқабатты тұрғын үй және 71 заңды тұлға пайдалануда.

Суды сырттан тасып жеткізу арқылы резервуар тұрақты түрде толықтырылып отыр.

Сондай-ақ, тұрғындарға ауызсу мен техникалық су цистерналы машиналар арқылы да тасымалдануда. Бұл жұмысқа 10 техника жұмылдырылған.

Еске сала кетейік, Екібастұздан Майқайың кентіне ауызсу жеткізетін үлкен құбыр жарылды.  

Майқайың кентінің тұрғындары күніне 1 мың текше метр ауызсу тұтынып келген. Қазір қысымның төмендеуіне байланысты «Майқайыңалтын» АҚ су таситын машиналарды жұмылдырды.

Құбырдағы ақауға байланысты «Богатырь-Көмір» кәсіпорнына су беру уақытша тоқтатылды

Соңғы жаңалықтар