Оқушыны жезөкшелікке мәжбүрлеу: Қызылордада жасөспірім қызды есірткі тұтынуға көндірген адам сотталды

ҚЫЗЫЛОРДА. KAZINFORM — Қызылорда қаласының № 2 сотында кәмелетке толмағанды психотроптық заттарды тұтынуға көндіру фактісі бойынша сотталушы Н.-ға қатысты қылмыстық іс қаралды.

Ол жабық сот отырысында ҚР Қылмыстық кодексінің 299-бабы 3-бөлігінің 1-тармағы бойынша жүргізілді. Сотталушы жәбірленушінінің кәмелет жасына толмағанын білген. Соған қарамастан оны бірнеше рет психотроптық заттарды тұтынуға көндiрген.

— Сотталушының кінәсі оқиға орнын қарап-тексеру және беттестіру жүргізу хаттамаларымен, жәбірленушінің жауаптарымен дәлелденді. Прокурор сотталушыны кінәлі деп танып, 8 жылға бас бостандығынан айыруды сұрады. Жәбірленушінің өкілі сотталушыға кешірім беретінін, бас бостандығынан айырумен байланысты емес жаза тағайындау жөнінде ойын білдірді. Қорғаушы тарап ҚР Қылмыстық кодексінің 299-бабының 1-бөлігіне қайта дәрежелеп, бас бостандығын шектеу жазасын тағайындауды сұрады. Аталған бабының санкциясы 7 жылдан 10 жылға дейін бас бостандығынан айыру жазасын көздейді. Іс бойынша жеңілдететін және ауырлататын мән-жайлар анықталмаған. Сот үкімімен сотталушы ҚР Қылмыстық кодексінің 299-бабы 3-бөлігінің 1)-тармағы бойынша кінәлі деп танылды. Оған 8 жыл мерзімге бас бостандығынан айыру жазасы тағайындалды, — деп мәлім етті Қызылорда қаласының № 2 сотынан.

Еске сала кетейік, Қызылордада сыныптасын жезөкшелікпен айналысуға мәжбүрлеген оқушылар күдікке ілінгенін жазған болатынбыз. 

Артынша Қызылордада келеңсіздікке жол бергендер қызметінен кетті.

Кейін ҚР ІІМ жәбірленуші тұратын аумақты тәулік бойы күзетті.

Ғани Бейсембаев оқушыны жезөкшелікке мәжбүрлеу дауына қатысты пікір білдірді.

Тергеу жүріп жатқанда Қызылордада оқушыны жезөкшелікке мәжбүрлеген 8 күдікті қамалды.

Кейінірек оқушыны жезөкшелікке мәжбүрлеуге қатысты 13 адам анықталды.

Сондай-ақ қараша айында Қызылордада оқушыны жезөкшелікке мәжбүрлеген айыпталушыға үкім шықты.

Ал Қызылорда облысының кәмелетке толмағандардың істері жөніндегі мамандандырылған ауданаралық сотында сотталушы К.-ға қатысты екі қылмыстық іс бойынша сот үкімі шықты.

Айта кетсек, оқушыны жезөкшелікке мәжбүрлеу ісі бойынша Қызылордада жеңгетайлық фактісіне қатысты сот үкімі шықты

Сондай-ақ оқушыны жезөкшелікке мәжбүрлеуге қатысты жеңгетайлық дерегі бойынша тағы бір сот үкімі шықты.