Ризабек Айтмұхан еркін күрестен Азия чемпионатының финалына шықты

АСТАНА. KAZINFORM — Қазақстан құрамасының спортшысы Ризабек Айтмұхан (97 келі) еркін күрестен Иорданияның астанасы Амманда өтіп жатқан Азия чемпионатының финалына шықты. Бұл туралы ҰОК хабарлады. 

Отандасымыз жартылай финалда ирандық Мохаммадмобин Азимимен белдесті. Тартысты өткен кездесуде қазақстандық балуан 2:0 есебімен жеңіске жетті. 

Ал, Рахат Қалжан 57 келіге дейінгі салмақта ирандық Джахангир Вализадеге 0:3 есебімен жол берді. Енді ол қола медаль үшін күреседі. 

Айта кетейік, финалдық бәсекелер Астана уақытымен 20:00-де басталады.

Еске салсақ, бұған дейін Иордания астанасы Амман қаласында өтіп жатқан Азия чемпионатында еркін күрестен қазақстандық балуандардың қарсыластары анықталғанын жазған едік.