Суданда әскери ұшақ апатқа ұшырады

АСТАНА. KAZINFORM – Апат салдарынан бейбіт тұрғындар мен әскерилер қаза тапты, деп жазады Анадолы.

Судан армиясы Умдурман аймағындағы Вади-Сейдна әскери базасынан ұшып шыққан әскери ұшақтың апатқа ұшырауынан әскери қызметкерлер мен бейбіт тұрғындардың қаза тапқанын хабарлады.

– Біздің бір ұшақ бүгін кешкілік Вади-Сейдна әскери базасынан көтерілгеннен кейін құлады, – делінген армия мәлімдемесінде.

Мәлімдемеде апат салдарынан бейбіт тұрғындар мен әскерилердің де қаза тапқаны және жараланғаны айтылған.

Өрт сөндірушілер оқиға орнында өртті ауыздықтаса, зардап шеккендер ауруханаға жеткізілген.
Al Arabiya телеарнасының хабарлауынша, Суданның Омдурман қаласындағы (Хартум провинциясы) Судан армиясына тиесілі әскери ұшақ апатынан 19 адам қаза тапқан.

Оқиғаға техникалық ақау себеп болған, ұшақ жергілікті авиабазадан көтерілгеннен кейін көп ұзамай құлаған. Апатта бортта болған экипаж мүшелері мен судандық әскерилер құрбан болған, сондай-ақ ұшақ құлаған жердегі тұрғын үйлердегі бейбіт тұрғындар көз жұмған. Құтқарушылар апат орнында үйінділерді тазалауды жалғастырып жатыр, делінген хабарда.

Айта кетейік, Бұған дейін Гондурас президентінің тікұшағы джунглиге апаттық жағдайда қонғанын жазған едік.