Тоқаев: Италиямен сирек жер металдарын игеру бағытында бірге жұмыс істеуге дайынбыз

АСТАНА. KAZINFORM — Мемлекет басшысы Қасым-Жомарт Тоқаев «Орталық Азия — Италия» бірінші саммитінде Орталық Азиядағы сирек жер металдарының кен орындары туралы өзекті ақпараттың бәрін бір жерге жинақтайтын өңірлік зерттеу орталығын құру туралы бастаманы еске салды.

— Өнеркәсіп кооперациясын нығайту үлкен келешектерге жол ашады. Бұл тұста Қазақстан сирек жер металдарының қомақты қорына иелік етіп отыр және біз осы бағытта Италиямен бірге жұмыс істеуге дайынбыз, — деді Мемлекет басшысы.

Президент Қазақстанның осы салада маңызды бастамасы бар екенін еске салды.

 — Қазақстан Орталық Азиядағы сирек жер металдарының кен орындары туралы барлық өзекті ақпаратты жинақтайтын өңірлік зерттеу орталығын құру туралы бастама көтерді. Біз италиялық компанияларға «Стратегиялық шикізат орнына — инвестициялар мен технологиялар» формуласын басшылыққа ала отырып, сирек жер элементтері мен минералдарды бірлескен геологиялық барлау және өндіру үшін қолайлы жағдайлар ұсынуға дайынбыз, — деді Қасым-Жомарт Тоқаев.

Айта кетейік, елордадағы Тәуелсіздік сарайында Мемлекет басшысы Қасым-Жомарт Тоқаевтың қатысуымен «Орталық Азия — Италия» алғашқы саммиті өтіп жатыр. 

Сондай-ақ, бүгін түске дейін Мемлекет басшысы Қасым-Жомарт Тоқаев пен Италия Министрлер Кеңесінің төрағасы Джорджа Мелони Астана халықаралық форумының екінші күніндегі пленарлық сессияға қатысты. 

Бұдан кейін Қазақстан Президенті мен Италия Премьер-министрі Ақордадағы келіссөз қорытындысы бойынша Стратегиялық серіктестікті кеңейту жөнінде Бірлескен мәлімдеме қабылдаған болатын.