Тұрақтандыру қоры: Ақтөбеде үш шаруаның өніміне басымдық берілді
АҚТӨБЕ. KAZINFORM – Ақтөбе облысында Тұрақтандыру қорының айналым қаржысы 1,9 млрд теңгенің құрап отыр. Биыл күзде де жергілікті тауар өндірушілерден көкөніс алынады.
Әлеуметтік маңызы бар азық-түлік тауарларының бағасын тұрақтандыру үшін қазіргі кезде шаруалармен келісім жасалды. Жергілікті шаруалар картоп, сәбіз, пияз және қырыққабат өсіріп жатыр.
- Бұған дейін 4300 тонна картоп, 1027 тонна сәбіз, 835 тонна пияз және 1100 тонна қырыққабат жинау үшін келісімшарт жасалған. Бәрі де үш жергілікті шаруаға тиесілі. Сондай-ақ, қызылордалық тауар өндіруші «Най-Мир» ЖШС-і жалпы сомасы 136 млн теңгеге 2023 жылдың күзгі өнімінен 340 тонна күріш жеткізеді. Ал 55 000 литр күнбағыс майын жеткізуге 48,6 млн теңге қаржы аударылды. Әр литрі 445 тг деп есептелді. Бұл өнімдер «Табыс» коммуналдық базары мен шағын базарларға, «Анвар» және «Дина» сауда желілеріне шығарылады. Бүгінгі таңда 18 әлеуметтік павильон жұмыс істейді. Олар арқылы Тұрақтандыру қорының резервінен өнімдерге тауарлық интервенция жүргізіледі. Айналым схемасы арқылы әлеуметтік маңызы бар азық-түлік тауарларының 9 түріне төмендетілген бағаны белгілеу бойынша 5 кәсіпкерлік субъектісіне 0,1 пайызбен жалпы сомасы 1 млрд 926 млн теңге несие ұсынылып, келісімшарт жасалды, - деп хабарлады «Ақтөбе» ӘКК-нің баспасөз қызметі.
Сонымен бірге 2023-2024 жылдарға жасалған келісімшарт бойынша 750 тонна сиыр етінің сүйекті жауырын, төс бөлігінің келісі 1750 теңгеден жеткізіледі. Бірінші сұрыпты ұнның 250, макарон өнімдерінің 150 тоннасы да алынады. Тұрақтандыру қорына майлылығы 2,5 пайыз болатын жұмсақ қаптамадағы пастерленген сүт, майлылығы 2,5 пайыз болатын жұмсақ қаптамадағы айран, майлылығы кемінде 72,5 пайызды құрайтын сары май, майлылығы 5-9 пайыз болатын сүзбе өндірушілермен де келісімшарт жасалды.
Айта кетейік, қазір Тұрақтандыру қорындағы күріштің келісі 420, ал өсімдік майының 1 литрі 467 теңгеден сатылып жатыр.
Өзге әлеуметтік тауарлар баға көтерілген кезде шығарылады.
Еске салсақ, Павлодар облысы кейбір азық-түліктің арзандығы бойынша еліміздегі бестікке кіреді.
