Вьетнамда караокедегі өрттен 11 адам мерт болды

АСТАНА. KAZINFORM – Вьетнам астанасы Ханой қаласындағы караоке-барда болған өрттен кем дегенде 11 адам мерт болды. Бұл туралы жергілікті полицияға сілтеме жасай отырып Reuters хабарлады, деп жазады Report.az.

Оқиға орнына жеткен құтқарушылар ғимараттан жеті адамды аман алып шыққан, оның екеуі ауруханаға жеткізілді.

Вьетнамның Қоғамдық қауіпсіздік министрлігі «өрт қойды» деген күдікпен ер адамның ұсталғанын хабарлаған.

Айтуларынша, мекеме қызметкерлерімен кикілжіңнен кейін ол ғимараттың бірінші қабатына бензин шашып, от қойған.

Тиісті бөлімшелер оқиғаның барлық мән-жайын анықтауда, делінген хабарда.

Айта кетейік, бұған дейін Вьетнамдағы ең бай әйелдердің бірі өлім жазасына кесілуі мүмкін екенін жазған едік.