Студенттер тұратын хостелдердің иелеріне міндеттер жүктеледі

АСТАНА. KAZINFORM – Қазақстанда кейбір студенттер жатақхана жетіспеушілігінен хостел жалдап тұруға мәжбүр. Биылдан бастап хостел иелеріне қосымша міндеттер жүктелмек. Толығырақ Ғылым және жоғары білім министрлігі жоғары оқу орнынан кейінгі білім комитеті төрағасының орынбасары Ақерке Абылайхан айтып берді.

«Хостелдер мәселесіне келсек, университет, хостел иесі және студент арасында үшжақты келісімшарт жасалады. Алматыда хостел иелері жоғары оқу орындарымен жұмыс істеуге мүдделі емес, оған себеп талаптардың күшейтілуі. Елордада Л. Гумилев атындағы Еуразия ұлттық университетінің студенттері қаладағы 6 хостелге жайғаспақ. Хостелдердегі өрт қауіпсіздігіне жергілікті Төтенше жағдайлар департаменті жауапты. Тағы бір жайт, енді хостелдерде тек қана студенттер тұратын болады, яғни бөгде адамдар тұрмайды. Сонымен қатар келісімшарт бойынша хостелдер иесіне міндеттер жүктеледі. Оның қатарына қауіпсіздік пен тазалық жатады», - деді А. Абылайхан. 

Одан бөлек, министрлік өкілі жалпы студенттерді жатақханамен қамту мәселелеріне тоқталды. 

Еске салсақ, былтыр Алматыда хостел өртеніп, 13 адам қаза тапты. 

Хостел ғимаратының иесі – «КУСА Халық» ЖШС. Оны жалға алған – «ALA Hostel» ЖШС. Нысан құрылыс талаптары мен өрт қауіпсіздігі ережелерін бұза отырып салынған. 

Бұл хостелде студенттер мен жалдамалы жұмысшылар тұрған. 

Мемлекет басшысы қаза тапқан Қазақстанның және шетел азаматтарының жақындары мен туған-туыстарына көңіл айтты.

Қайғылы жағдайға кінәлілер заң бойынша жауапқа тартылатынын жеткізіп, Үкімет пен әкімдікке зардап шеккендердің отбасыларына көмек көрсетуді тапсырды. 

Айта кетсек, Астана қаласы төтенше жағдайлар департаменті жыл басында ұсынған мәлімет бойынша елордада 87 хостел бар, 8 хостел өз еркімен жабылған.