Ақтөбеде биылғы оқу жылында 6 оқушы астан уланған

АҚТӨБЕ. KAZINFORM — Ақтөбе қаласында биылғы оқу жылында бастауыш сыныптың 6 оқушысы астан уланды. Эпидемиологтар істі полицияға тапсырды.

Ақтөбе облысы бойынша биыл мектепте жаппай улану дерегі тіркелген. Облыстық санитариялық-эпидемиологиялық бақылау департаменті басшысының орынбасары Нұрлыбек Досжановтың айтуынша, бастауыш сыныптың 6 оқушысы ауырған соң мектеп асханасына тексеру жүргізілді.

— Тексеру жүргізіліп, барлық материал полицияға жолданды. Жедел ішек ауруына шалдыққан 6 жағдай тіркелсе, төртеуінде гастрит, екеуінде сальмонеллез болып шықты. Балалар үйден, мектептен, көшеден тамақтанған. Нақты неден ауырғаны белгісіз әлі. Іс қалалық полиция басқармасы Астана аудандық № 1 полиция бөліміне берілді. Қылмыстық кодекстің 304 бабы 1 бөлігі бойынша сотқа дейінгі тергеп-тексеру жүріп жатыр, — деді Ақтөбе облыстық санитариялық-эпидемиологиялық бақылау департаменті басшысының орынбасары Нұрлыбек Досжанов.

Алайда Ақтөбе облыстық ПД баспасөз қызметі бұл істің қай сатыда екенін айта алмады. Ал Ақтөбе облыстық білім басқармасы қандай да бір ақпарат бермеді.

Айта кетейік, былтыр Ақтөбеде 10 адам қоғамдық тамақтану орнында уланған. Оның жетеуі бала. Әкімшілік құқықбұзушылық туралы кодекстің 463 бабы 1 тармағы негізінде 86 250 теңге айыппұл салынды. Ал 425 бабы 2 тармағы негізінде қызметі 1 айға тоқтатылып, 1,5 млн теңге көлемінде айыппұл салынды. Мұндай жағдайдың алдын алу үшін эпидемиологтар кәсіпкерлерді жиып, санитарлық талаптарды түсіндіріп тұрады.

Еске салсақ, Ақтөбе облысында биыл 9 адамнан менингококк инфекциясы анықталып, расталды. Эпидемиологтар 250 адамды тексергенімен, кімнің вирус таратып жүргенін анықтай алмай отыр. 

Видео: Алтынай Сағындықова