Талғар трагедиясы: TSARKA бот арналардың шектен тыс белсенділігін тіркеді
АСТАНА. KAZINFORM – Кибершабуылдарды талдау және зерттеу орталығы апта басынан бері әлеуметтік желі қолданушылары Талғардағы қайғылы оқиғаны шектен тыс белсенді қызығушылықпен талқылағанын тіркеген. Тіпті аномальды өсім байқалған. Бұл туралы хакерлік компания мәлім етті.
Аталмыш маңызды оқиғаға қызығушылықтың артуын бас пайдасына сәтті қолданғандар да бар.
Алматы мен өзге қалаларда митинг болып жатыр деген мақамда жалған ақпарат таратып, қаңтар оқиғасы кезінде түсірілген ескі видеоны монтаждап, бейне таратқан.
Мұндай жарияланымдар TikTok пен Instagram әлеуметтік желілерінде көп тараған. Мәселен, TikTok-та аккаунт ашылғаннан бастап үш күннің ішінде 850 мың қаралым жинаған. Ол бейнежазбада мүлде болмаған ереуіл туралы жалған видео бар.
— Аккаунттар мен пікірлерді талдау барысында 50 000 жуық робот боттар алдын ала келісу арқылы жұмыс жасағаны аңғарылған. Әлеуметтік желілерде кездесетін видео жазбаларға сыни көзбен қарап, дереккөзін тексеруге шақырамыз, — делінген хабарламада.
Еске салайық, 4 қазанда Талғар қаласындағы төбелестен бір адам қайтыс болғанын жазғанбыз.
Ашулы талғарлықтар жасөспірім өліміне байланысты наразылыққа шықты.
Алматы облысының Прокуратурасы кісі өлтіру туралы бұл іс ерекше бақылауға алынғанын ресми түрде хабарлады.
Ішкі істер министрі Ержан Сәденов Алматы облысы Талғар ауданындағы жасөспірімнің өліміне қатысты істі жеке бақылауына алды.
12 қазан түнде қара жамылған отбасының үйі өртеніп кетті. Алматы облысының Полиция департаменті бөтеннің мүлкін қасақана жою фактісі бойынша іс қозғады.
Сондай-ақ Бас прокуратура қылмысты ашу үшін ведомствоаралық жедел-тергеу тобы құрылғанын мәлімдеді.
15 қазан күні Талғар қаласының әкімі Бахыт Қуатбекұлы Күрішбеков, Талғар қаласы әкімінің орынбасары Матан Сағындық өз міндеттерін тиісті деңгейде атқармағаны үшін лауазымдарынан босатылды.
Ішкі істер министрлігінің өкілдері БАҚ қызметкерлеріне Шерзат Болат қаза тапқан жерде камераға түсіп қалған видеоны көрсетті.
Жақында Шерзат Полаттың өліміне қатысты қылмыстық істі тергеу жыл соңына дейін аяқталатыны айтылды.
Талғар маңында Шерзат Полаттың ағасы өлі табылды.
Шерзат Полаттың әкесі ұсталып, Қаржаубай Нұрымов 15 тәулікке қамалды.
Артынша үстінен қылмыстық іс қозғалды.
